বাৰছোৱা অংকীয়া নাট

পৰিচয় : 

অসমীয়া নাটকৰ উৎপত্তি হৈছিল মহাপুৰুষ শ্ৰীমন্ত শংকৰদেৱৰ দ্বাৰা। যি সমূহ নাটকক পাছলৈ অংকীয়া নাট নামেৰে অভিহিত কৰা হয়। শংকৰদেৱৰ লগতে মহাপুৰুষ মাধৱদেৱে ও অংকীয়া নাট বৰগীত আদি ৰচনা কৰে।এই আলোচনাটিত মহাপুৰুষ শ্ৰীমন্ত শংকৰদেৱ আৰু মাধৱ দেৱৰ বাৰছোৱা অংকীয়া নাট সমূহৰ বিষয়ে বৰ্ণনা কৰা হৈছে।

বাৰছোৱা অংকীয়া নাট :

বাৰছোৱা অংকীয়া নাট কাক বোলে বা বাৰছোৱা অংকীয়া নাট মানে কি বুলি ক'লে আমি কব পাৰোঁ যে মহাপুৰুষ শ্ৰীমন্ত শঙ্কৰদেৱ আৰু মাধৱদেৱৰ একক অংক বিশিষ্ট ব্ৰজাৱলী ভাষা যুক্ত বাৰ খন  অংকীয়া নাটককেই বাৰছোৱা অংকীয়া নাট বোলা হয়। শ্ৰীমন্ত শংকৰদেৱৰ ছয়খন আৰু মাধৱদেৱৰ ছয়খন মুঠ বাৰ খন নাটকক একেলগে বাৰছোৱা বুলি কোৱা হয়।

শংকৰদেৱৰ অংকীয়া নাট কেইখন :

১/কালি দমন নাট ।        ২/পত্নী প্ৰসাদ নাট ।

৩/কেলিগোপাল নাট ।    ৪/ৰুক্মিণী হৰণ নাট ।

৫/পাৰিজাত হৰণ নাট ।  ৬/ ৰাম বিজয় নাট ।

মাধৱদেৱৰ ঝুমুৰা নাট কেইখন :

১/অজ্জুন ভঞ্জন নাট।     ২/চোৰধৰা নাট।
৩/পিম্পৰা গুচোৱা নাট।  ৪/ভূমি লেটোৱা নাট।
৫/ভোজন বাহাৰ নাট।     ৬/ভূষণ হেৰোৱা নাট।

বাৰছোৱা অংকীয়া নাট সমূহ :

ৰচনা ৰীতি অনুসৰি শ্ৰীমন্ত শংকৰদেৱৰ দ্বাৰা ৰচিত ছয়খনি নাটককেই পূৰ্ণাংগ অংকীয়া নাট হিচাপে ধৰা হয়। ইয়াৰ বিপৰীতে মহাপুৰুষ মাধৱদেৱৰ দ্বাৰা ৰচিত অজ্জুন ভঞ্জন নাট খনিৰ বাদে বাকী নাট কেওখিনিক ঝুমুৰা নামেৰে জনা যায়।যত নাটৰ সম্পূৰ্ণ কাহিনীৰ পৰিবৰ্তে একোটা ক্ষুদ্ৰ ঘটনা বা কথাবস্তু উপস্থাপন কৰা হয়।তলত বাৰ খন নাটকৰ বিষয়ে বৰ্ণনা কৰা হৈছে।

আৰু পঢ়িব পাৰে- ঝুমুৰা-অংকীয়া নাটৰ ৰস।

শংকৰদেৱৰ নাটক সম্পৰ্কে আলোচনা :

শংকৰদেৱৰ নাটক সম্পৰ্কে আলোচনা কৰা বুলিলে ক'ব পাৰি যে শংকৰদেৱৰ ছয়খন নাটকৰ ভিতৰত ৰামায়ণৰ মূলনায়ক ৰামক কেন্দ্ৰ কৰি লিখা ৰাম বিজয় নাট খনিৰ বাদে বাকী পাঁচখন নাট কৃষ্ণক কেন্দ্ৰ কৰি ৰচনা কৰিছে।

১) কালি দমন নাট :

শ্ৰী মদ্ভাগৱত মহাপুৰাণৰ দশম অধ্যায়ৰ পৰা কালি দমন নাটৰ কাহিনী ভাগ লোৱা হৈছে। ইয়াত শিশু কৃষ্ণৰ অলৌকিক শক্তি ভকতৰ অন্তৰত চুব পৰাকৈ তেওঁৰ কৰ্ম, প্ৰভাৱ আদি বৰ্ণনা কৰা উপৰিও পাপৰ ৰূপ কালি নাগক পূণ্য ৰূপ কৃষ্ণই দমণ কৰাই হৰি ভক্তিৰ শক্তি প্ৰদৰ্শন কৰা হৈছে।

নাট খনিত গীতৰ সংখ্যা তেৰ টাৰ বিপৰীতে ৰাগৰ সংখ্যা এঘাৰ টা। শ্লোকৰ সংখ্যা বাইশ টা আৰু ভটিমা পয়াৰ চাৰি টা। লগতে,তালৰ সংখ্যা মুঠ পাঁচ খন দেখা পোৱা যায়।

২) পত্নী প্ৰসাদ নাট :

পত্নী প্ৰসাদ নাট খনি ভাগৱতত বৰ্ণনা কৰা কাহিনী ফালৰ পৰা চালে কালি দমন নাটৰ পাছত ৰচনা কৰা যেন লাগে যদিও ৰচনা ফালৰ পৰা পণ্ডিত সকলে কালি দমন নাটৰ আগত ৰচনা কৰা বুলি ক'ব খোজে।এই নাট খনিৰ কাহিনী ভাগ শ্ৰী মদ্ভাগৱত পুৰাণৰ দশম স্কন্ধৰ পৰা লোৱা হৈছে।নাট খনিত কৃষ্ণ ভক্তি ৰস দেখা যায়।

গীতৰ ক্ষেত্ৰত নাট খনিত আঠ টা গীত থকাৰ বিপৰীতে সাত টা ৰাগ ইয়াত দেখা পোৱা যায়। আনহাতে, শ্লোক আৰু ভটিমা দুয়োটাৰে দুটাকৈ মুঠ চাৰিটা শ্লোক আৰু ভটিমা নাট খনিত আছে।তাল এই নাটত মুঠ চাৰি খন।

৩) কেলিগোপাল নাট :

এই নাটক খনিৰ বিষয় বস্তু প্ৰধানকৈ ভাগৱত পুৰাণৰ দশম স্কন্ধৰ অন্তৰ্গত যদিও বিষ্ণু পুৰাণ আৰু ব্ৰহ্মবৈবৰ্ত পুৰাণ আদিৰ পৰাও আংশিক তথ্য নাট খনি ৰচনাত দেখা পোৱা যায়। ইয়াৰ উপৰিও "গীত-গোবিন্দ" ৰো প্ৰভাৱ নাট খনিত স্পষ্ট।নাট খনিত কৃষ্ণ ভক্তি ৰস দেখা পোৱা যায়।

এই নাটত একত্ৰিশ টা গীত আৰু পোন্ধৰ টা ৰাগ থকাৰ উপৰিও ২৫ টা শ্লোক,দুটা ভটিমা দেখা যায়। লগতে,তালৰ ক্ষেত্ৰত মুঠ চাৰি খন তাল দেখা যায়।

৪) ৰুক্মিণী হৰণ নাট :

ৰুক্মিণী হৰণ নাটখন গুৰু জনাই ভাগৱত পুৰাণ, বিষ্ণু পুৰাণ আদিৰ পৰা কাহিনী লৈ ৰচনা কৰা। এইখন নাটকতো নৱ ৰসৰ সমাহাৰ দেখিলেও মূলত ভক্তিক মূখ্য ৰস হিচাপে স্হান দিয়া হৈছে।নাট খনিত গীতৰ সংখ্যা একত্ৰিশ টা আৰু ৰাগৰ সংখ্যা পোন্ধৰ টা। আনহাতে, শ্লোকৰ সংখ্যা তিৰাল্লিশ টা হোৱাৰ লগতে ইয়াত চাৰিটা ভটিমা আছে।নাট খনিত তাল সাত খন ব্যৱহাৰ হোৱা দেখা যায়।

৫) পাৰিজাত হৰণ নাট :

এই খন নাটক ভাগৱতৰ কাহিনী কেন্দ্ৰিক যদিও ইয়াত বিষ্ণু পুৰাণ,হৰি বংশৰ প্ৰভাৱ দেখা যায়। লগতে শংকৰদেৱৰ নিজা সৃজনীশীল নাটক খনত স্পষ্ট। গীতৰ সংখ্যা নাটক খনত ওঠৰ টা হোৱাৰ বিপৰীতে ৰাগৰ সংখ্যা হ'ল চৈধ্য টা। আনহাতে,চৌৰাল্লিশ টা শ্লোক সমৃদ্ধ এইখন নাটকত ভটিমা হ'ল সাতটা।তাল ইয়াত পাচ খন দেখা যায়।

৬) ৰাম বিজয় নাট :

মহাপুৰুষ শ্ৰীমন্ত শংকৰদেৱৰ শেষ বয়সৰ একমাত্ৰ ৰামায়ণৰ কাহিনী যুক্ত নাট খনিয়েই হৈছে ৰাম বিজয় নাট।এই নাট খনৰ কাহিনীভাগ ৰামায়ণৰ আদিকাণ্ডৰ পৰা লোৱা।নাটখনত বিশ টা গীতৰ লগতে ন'টা ৰাগ আছে। ইয়াৰ উপৰিও শ্লোকৰ সংখ্যা হ'ল সাতত্ৰিশ টা আৰু ভটিমা আছে চাৰিটা।তাল ইয়াত ছয় খন ব্যৱহাৰ হোৱা দেখা যায়।

মহাপুৰুষ মাধৱদেৱৰ ঝুমুৰা :

শংকৰদেৱৰ পাছতে মহাপুৰুষ মাধৱদেৱে ও নাটক ৰচনা কৰিছিল। অৱশ্যে এই সমূহৰ ভিতৰত কেৱল অজ্জুন ভঞ্জন নাট খনিৰ বাহিৰে বাকী আটাইকেইখন নাটককেই ঝুমুৰা বুলি কোৱা হয়। কাৰণ সি সমূহত একোটা সম্পূৰ্ণ কাহিনী দেখা নাযায়। য'ত কেৱল একোটা ক্ষুদ্ৰ ঘটনা বা কথাবস্তু উপস্থাপন কৰা হৈছে। সেয়েহে এই সমূহক ঝুমুৰা বোলা হয়।

মাধৱদেৱৰ ঝুমুৰা সমূহৰ বিষয়ে পঢ়িবলৈ ক্লিক কৰিব পাৰে- মহাপুৰুষ মাধৱদেৱৰ ঝুমুৰা সমূহ।

সামৰণি :

মহাপুৰুষ শ্ৰীমন্ত শংকৰদেৱ আৰু মহাপুৰুষ মাধৱদেৱৰ দ্বাৰা বিৰচিত বাৰছোৱা অংকীয়া নাট অসমৰ সত্ৰীয়া সংস্কৃতিৰ লগতে অসমীয়া নাট্য সাহিত্যৰ বাবে আপুৰুগীয়া সম্পদ।যি চন্দ্ৰ সূৰ্য থকালৈকে পৃথিৱীত জিলিকি থাকিব। কেৱল নিষ্ঠা আৰু পৰম্পৰাৰে এই সম্পদ ৰাজি সুৰক্ষিত কৰি ৰখাৰ লগতে প্ৰচাৰ আৰু প্ৰসাৰৰ দ্বাৰা গুৰু দুজনাৰ মহান অৱদান আমি সকলোৱে জীয়াই ৰাখিব লাগিব।।

আৰু পঢ়িব পাৰে- অংকীয়া নাটৰ বৈশিষ্ট্য আৰু উদ্দেশ্য।