অভিনয় প্ৰকাৰ সহ প্ৰয়োগ 
পৰিচয় :
অভিনয় কাক বোলে বুলি ক'লে ক'ব পাৰি যে এজনে আন এজন ব্যক্তিৰ অঙ্গি-ভঙ্গি,আচাৰ ব্যৱহাৰ আদিৰ হুবহু একে কৰি প্ৰদৰ্শন কৰাকেই অভিনয় বোলা হয়। অৰ্থাৎ ভাৱ ৰূপক এক গতিৰ মাধ্যমেৰে শ্ৰোতা দৰ্শকৰ অন্তৰলৈ নি ৰস নিস্পতি ঘটালেই তাক অভিনয় বোলা হয়। এই লেখাটিত অভিনয় প্ৰকাৰ সহ প্ৰয়োগ কেনেদৰে অভিনয়ত দেখা যায়, সেই বিষয়ে আলোচনা কৰা হৈছে।
অভিনয় কেই প্ৰকাৰ আৰু কি কি?:
শাস্ত্ৰীয় নৃত্য ৰূপে খ্যাত অন্য সমূহ নৃত্যৰ দৰে সত্ৰীয়া নৃত্য ধাৰাটো চাৰি বিধ বা চাৰি প্ৰকাৰ অভিনয় (Acting) প্ৰয়োগ হোৱা দেখা যায়।সেই কেইটা হৈছে...
| ১.আঙ্গিক। | ২.বাচিক। |
| ৩.আহায্য । | ৪.সাত্বিক। |
অভিনয় প্ৰকাৰ সহ প্ৰয়োগ
উপৰোক্ত চাৰি বিধ অভিনয়ৰ প্ৰকাৰ সমূহৰ লগতে প্ৰয়োগ বিধি সমূহ হৈছে-
(১). আঙ্গিক অভিনয় :
অংগ,প্ৰতংগ আৰু উপাংগৰ প্ৰয়োগত বা এই কেইটাৰ সহায়ত কৰা অভিনয়কেই আঙ্গিক অভিনয় বোলা হয়।
আৰু পঢ়িব পাৰে- অংকীয়া নাটৰ বৈশিষ্ট্য আৰু উদ্দেশ্য।
এই আঙ্গিক অভিনয় আকৌ তিনি প্ৰকাৰ, যেনে- মুখজ,শৰীৰ আৰু চেষ্টাকৃত।
মুখজ অভিনয় হৈছে চকুৰ চেলাউৰি, চকুৰ পতা, চকুৰ মণি,নাক,ওঁঠ,থুতৰি,মুখ আদি উপাংগৰ সহায়ত সমাধা হোৱা অভিনয়।
শিৰ,বুকু,শৰীৰৰ দুয়ো কাষ,নিতম্ব,হাত আৰু ভৰিৰ সহায়ত কৰা অভিনয় ৰ নামেই শৰীৰ অভিনয়।
আনহাতে, সৰ্ব শৰীৰৰ সহায়েৰে সম্পন্ন কৰা অভিনয়েই হৈছে,চেষ্টাকৃত অভিনয়।
(২).বাচিক অভিনয় :
যেতিয়া কথা বা শব্দ বা বাক্য ব্যৱহাৰ কৰি যিকোনো অভিনয় সমাপন কৰা হয়, তেতিয়া সেই অভিনয়ক বাচিক অভিনয় বোলা হয়।
এই অভিনয়ৰ, প্ৰয়োগ নাটকত সংলাপ বা বাক বা কথন আদি ব্যৱহাৰত দেখা যায়।
(৩).আহায্য অভিনয় :
সাধাৰণতে, সাজ-পোছাক, অলংকাৰ আদিৰ সহায়ত সম্পন্ন কৰা অভিনয়েই হৈছে আহায্য অভিনয়।
নাট্যশাস্ত্ৰৰ প্ৰণেতা ভৰত মুণিয়ে এই আহায্য অভিনয়ক পুস্ত, অলংকাৰ,অংগৰচনা আৰু সঞ্জীৱ নামেৰে পুনৰ চাৰি ভাগত বিভক্ত কৰিছে।
- পুস্ত :- বাঁহ,কাঠ আদিৰে নিৰ্মাণ কৰা বস্তু ।
- অলংকাৰ:- গহনা আদিৰে প্ৰস্তুত কৰা বিভিন্ন সামগ্ৰীৰ ।
- অংগৰচনা:- মুখমণ্ডল আৰু দেহৰ কাপোৰ ব্যৱহাৰ নকৰা অংশত প্ৰয়োগ কৰা ৰং বৰণ।
- সঞ্জীৱ:- বিভিন্ন ধৰণৰ কৃত্ৰিম পশু-পক্ষীৰ অৱতাৰণা।
(৪).সাত্বিক অভিনয় :
সমাহিত মনেৰে ৰজ: আৰু তম:ভাৱৰ পৰিবৰ্তে সত্ব ভাৱৰ সহায়ত কৰা অভিনয়কেই সাত্ত্বিক অভিনয় বোলে।
এই সাত্বিক ভাৱ ৮ প্ৰকাৰৰ যেনে-- ১/স্তম্ভ(সংজ্ঞাহীন)
- ২/স্বেদ(ঘাম ওলোৱা)
- ৩/ৰোমাঞ্চ (শৰীৰৰ নোম ঠিয় হোৱা)
- ৪/স্বৰভঙ্গ(মাত গলগলীয়া হোৱা)
- ৫/বেপথু(ঘন ঘনকৈ উশাহ লোৱা)
- ৬/বৈবণ্য(মুখ শেতা পৰা)
- ৭/অশ্ৰু(চকুৰ পানী) আৰু
- ৮/প্ৰলয়(নিচেষ্ট হৈ মাটিত পৰা)।
আনহাতে,সাত্বিক অভিনয় ২প্ৰকাৰৰ। সেইয়া হৈছে ক্ৰমে...
(১).লোক ধৰ্মী অভিনয় :
অনাড়ম্বৰী, স্বাভাৱিক তথা বাস্তৱ আৰু লোক মনৰ ওচৰ চপাই কৰা অভিনয়।
(২). নাট্য ধৰ্মী অভিনয় :
বাস্তৱতাৰ উদ্ধলৈ গৈ আড়ম্বৰী তথা ৰীতি পূৰ্ণ ভাৱে যি অভিনয় কৰা হয়,সিয়েই নাট্য ধৰ্মী অভিনয়।
সামৰণি:
এনেদৰেই শাস্ত্ৰীয় নৃত্য সমূহৰ লগতে নাট্য বিধিৰ লগতো অভিনয় সম্পন্ন কৰা হয়। সেই একে সমূহ ৰীতি-নীতি তথা বিধিক মানিয়েই সত্ৰীয়া নৃত্যত, অংকীয়া নাট সমূহত অভিনয় প্ৰকাৰ সহ প্ৰয়োগ কৰা দেখা যায়।।
Comments
Post a Comment